روایت اور تکنیکی سائنس کے درمیان ہم آہنگی کی ضرورت

اوپر بیان کردہ تصور’’ کلایئوتھامپسن‘‘( Clive Thompson)کی خوش امیدی کے بالکل برعکس ہے۔ اپنی معروف کتابSmarter Than You Think میںتھامپسن بیان کرتے ہیں کہ کس طرح imaging technology اور انٹرنیٹ لوگوں کی زندگی کو بہتر بنانے میں معاونت کررہے ہیں اور ان سے سماج پر بھی مثبت اثرات مرتب ہو رہے ہیں۔ وہ اس تعلق سے واقعات بیان کرتے ہیں ان میں سے ایک واقعہ ’’گورڈون بیل‘‘( Gordon Bell) کا ہے، جو اپنے ساتھ ایک کیمرا اور ایک آڈیو ریکارڈر لے کر چلتا ہے اور تقریبا ہر سامنے آنے والی چیز کو ریکارڈ کر لیتاہے۔ اس طرح وہ اپنی یادداشت کو محفوظ کر لیتا ہے اور عرصہ دراز کے بعد بھی اس کے لیے یہ ممکن ہوتا ہے کہ وہ بغیر کسی مشکل اور پریشانی کے، ایک آسان سی کوشش کے ذریعہ کسی بھی شخص کے ساتھ ہونے والی ملاقات یا کسی نوع کی مشغولیت کو دوبارہ ذہن میں تازہ کر سکے۔ بیل کے مطابق سب سے دلچسپ بات یہ ہے کہ اس عمل سے اسے ذہنی سکون حاصل ہوتا ہے۔یہ خیال کہ ہر وہ چیز جسے وہ پڑھتا ، دیکھتا ، یا سنتا ہے، محفوظ ہے؛ اسے ہر لمحہ زندگی کا احساس دلاتا رہتا ہے، اور اسے ہر کام کو پوری توجہ سے کرنے میں مدد دیتا ہے۔(2)تھامپسن دوسری مثال ایسےAlzheimer کے مرض سے متاثر ا فراد کی دیتے ہیں جو اپنے ساتھ کیمرے رکھتے ہیں اور رات میں سونے سے پہلے دن بھر کی رکارڈنگ دیکھ لیتے ہیں۔ اس پر ہونے والی تحقیقات سے جو نتائج برآمد ہوئے ہیں ان کے مطابق اس عمل کے ذریعہ ان کی یادداشتیں تیزی سے مضبوط ہو رہی ہیں۔

اس پوری بحث سے جو بات سمجھ میں آتی ہے وہ یہ ہے کہ کسی بھی نئی چیز کے بارے میں شبہ میں پڑنا ہمیشہ صحیح نہیں ہوتا۔ سقراط Phaedrus (ایک مکالمہ جسے افلاطون نے لکھا تھا) میں فن تحریر کی مخالفت کرتا ہے کیوں کہ اس کے مطابق اس طرح لوگ چیزوں کو بھولنے لگیں گے۔ افلاطون اپنے دوسرے مکالمے Gorgias میں فن بلاغت کی مخالفت کرتا ہے، کیوں کہ اس کا ماننا ہے کہ اس کے ذریعہ سچائی کی ملمع سازی کی جا سکتی ہے اور لوگوں سے ناجائز فائدہ اٹھایا جا سکتا ہے۔ لیکن جیسا کہ ظاہر ہے، تاریخ کے عمل کو کوئی روک نہیں سکتا۔ سقراط بھی نہیں۔ ہر ٹیکنالوجی دو دھاری تلوار کی طرح ہوتی ہے۔ ایک بار وجود میں آ جانے کے بعد اچھے اور برے ہر طرح کے لوگ اس کے استعمال کے لیے آزاد ہوتے ہیں۔ سکون قلب کا سامان مہیا کرنے کا ایک طریقہ تو’’ ڈیزرٹ فادرس‘‘ کے نقش قدم پر چلتے ہوئے دنیا سے بے تعلق ہو جانا ہے، جس میں وسوسوں اور خواہشات کے خلاف سخت احتیاط کی تاکید کی جاتی ہے۔ تاہم گوشہ نشیں ہو جانا تاریخ کے عمل پر کسی طرح اثر انداز نہیں ہو سکتا۔ اس کے بر عکس دوسرا طریقہ یہ ہے کہ ایک ایسے درویش کی طرح جو زندگی کو ایک متحرک چیز سمجھتا ہے، شہروں کی افراتفری اور ہما ہمی کے درمیان قلبی سکون حاصل کیا جائے۔وہ رقص بھی کرتا ہے لیکن اپنے مرکز سے دور بھی نہیں جاتا۔

ایسا بھی نہیں کہا جا سکتا کہ ہر نئی ایجاد مثبت اور مفید ہی ہوتی ہے۔ بیسویں صدی کی تباہ کن جنگیں اس دعوے کی تائید کے لیے کافی ہیں۔ ایسی صورت میں روایت ایک ضابطے کا کردار ادا کر سکتی ہے، اور اسے کرنا بھی چاہیے، تاکہ وہ ہمیں احتیاط برتنے اور اپنے اخلاقی رویہ پر غور کرتے رہنے کی دعوت دیتی رہے اور ان چیزوں کا احساس دلائے جو انسان کو انسان بناتی ہیں۔ تاہم یہ ضروری ہے کہ احتیاط پسندی مفلوج اور جامد کردینے کی حد تک نہ ہو۔ دین میں تجدید کی راہ میں پہلا قدم سائنس اور ٹیکنالوجی کی مسحور کن ترقیا ت کی قدردانی کرنا اور خود کو سائنس کے کرشمے اور دانشوروں کی فکری پرواز سے مسحور ہونے دینا ہے۔بھلے ہی آپ ان کے نظریات سے اتفاق نہ کرتے ہوں۔ جدید سائنس کے پاس تخلیق کائنات کی ایک الگ کہانی ہے، جو بالکل نئی ہے۔ اس نے ایک پیچیدہ کائنات سے ہمیں روشناس کرایا ہے،جس میں ایسی حقیقتیں پنہاں ہیں جو فکر کے قوانین (laws of thought) کو بھی چیلنج کرتی ہیں۔

ہم نے ان سب کو ابھی سمجھنا شروع ہی کیا ہے۔ آن لائن جرنل’’ تجدید‘‘ کا بنیادی مقصد نئی علمی روایت اور تجربات کو قدیم روایت سے ہم آہنگ کرنا ہے۔ جدید دنیا میں اسلامی تعلیمات کی تجدید کی تحریک کے ایک حصے کے طور پر ہم نے مدرسے کے فارغین کے ساتھ اپنے سفر کا آغاز کیا ہے۔ یہ طلبہ مدارس اسلامی روایت کا تو بخوبی ادراک رکھتے ہیں، تاہم انہیں باضابطہ طور پر تکنیکی سائنس کی دنیا سے روشناس ہونا بھی ضروری ہے۔ ہمارے خیال میں وہ فعال فکری رہنما کی مانند ہیںنہ کہ جامد مقلدین کے۔ ممکن ہے کہ تجدید کی تحریک کے پاس شاندار مستقبل کی تعمیرکے لیے سوالوں کا صرف ایک ہی جواب نہ ہو۔ بلکہ ہوسکتا ہے کہ اس کے مختلف جوابات ہوںجو باہم مختلف اورمتصادم بھی ہوں۔ تاہم یہ تصادم تعمیری ہوگا۔ لہذا تجدید کا مقصد ایک ایسا پلیٹ فارم تعمیر کرنا ہے جس کا مقصد یہ نہیں ہے کہ لو گوں کو ہم خیال بنانے کی کوشش کی جائے بلکہ اختلاف کے معیار کوبلند کیا جائے۔ زندہ روایات ہمیشہ ایسی ہی ہوتی ہیں: انتہائی متمول اورمتنوع ۔وہ وقت کے اہم سوالات کا جواب دینے کے لیے ہمیشہ داخلی سطح پر مکالمے میں مشغول رہتی ہیں۔
( ترجمہ : ایم علی ،رابطہ مصنف : mmirza@nd.edu)

حوالہ جات